نن چې د اكتوبر له پنځلسمې سره يې سمون خوري، په نړۍ كې د لاس وينځلو ورځ لمانځل کېږي

 د لاس وينځلو په نوم د يوې ورځ د نومولو مقصد دا دى چې په دنيا كې خصوصا په هغو ټولنو كې چې خواري او بې سوادي پكې زياته ده، خلك د لاسونو پاك ساتلو ته ډېر پام وكړي، څو په دې ډول د خلكو په تېره بيا د ماشومانو د ناروغيو او مرګونو اندازه كمه شي.

  له احصاييو سره سم، په نړۍ كې  هره ورځ كابو پنځۀ زره ماشومان د اسهال د ناروغۍ په وجه سا وركوي، چې كه چېرې ماشومان تر ډوډۍ خوړلو د مخه او دغه راز تشناب او قضاى حاجت ته تر تلو وروسته لاسونه په صابون پاك ووينځي نو د مرګونو دغه اندازه به نيمايي ته راټيټه شي.

 دملګرو ملتونو د ماشومانو د صندوق، يونيسف، ويانده مېرمن نيك تاويو وايي چې د لاس وينځلو د اهميت  په ساده حقيقت باندې د خلكو د خبرولو لپاره ملګرو ملتونو پريكړه وكړه چې د اكتوبر پنځلسمه نېټه د لاس وينځلو ورځ ونوموي.

  د احصاييو مطابق هغه ماشومان چې تر ډوډۍ دمخه او تر قضاى حاجت وروسته خپل لاسونه په صابون سم نۀ وينځي، او په همدې علت په اسهال او نورو ناروغيو مبتلا كېږي او سا وركوي، تر ډېره حده له وروسته پاتې هيوادونو سره تعلق لري. له راپورونو سره سم، افغانستان يو هغه هيواد دى چې د ماشومانو نظافت او حفظ اصحې ته پكې توجه ډېره كمه ده.

   ميرمن تاويو وويل چې په صابون باندې د لاس وينځل نه يوازې د اسهال او نس ناستې بلكې د ځينو نورو وژونكو ناروغيو په كمېدو كې هم لويه مرسته كولاى شي، نو پكار ده چې ميندې او پلرونه په دې ساده حقيقت خبر شي، خپل ماشومان تر ډوډۍ خوړلو دمخه او تشناب ته تر تلو وروسته په صابون باندې په لاس وينځلوعادت كړي  او په دې ډول د خپلو ماشومانو ژوند ته ورپېښ خطرونه كم كړي

 د پکتيکا ولايت چارواکي وايي، چې په دې ولايت کې يې د پو لړ پلټونکو عملياتو په ترڅ کې څلور وسله وال طالبان نيولي دي .

 د پکتيکا د والي وياند حميدالله ژواک تاند ته وويل، چې ياد شوي کسان يې د نوموړي ولايت په ګومل او يحيى خېلو ولسواليو کې نيولي دي . 

نوموړى وايي، چې له دغو کسانو سره يې يوه موټر او يو موټر سايکل چې په ترهګريزو فعاليتونو کې يې کارول نيولي دي . 

تر دې مهاله وسله والو طالبانو په دې اړه رسنيو ته څه ندي ويلي

(چهارشنبه)دهرات ولایت په جنوب کې ددولت ضد وسله ولو هغه محبس کشف شو چې پکې درې دولتی سرتیري او یو ملکي وګري بندیان ول. 

امنیتی چارواکي وايي په دغو عملیاتو کې د دولت ضد شپږ وسله وال له یوې اندازې وسلو او مهماتو سره نیول شوي دي.

د ۲۰۷ ظفر قول اردو ویاند ډگروال بصیر احمد غوري په وینا دغه محبس د ګذرې ولسوالۍ په یوه غرنی سیمه کې دافغان او ا ئتلافی ځواکونو په ګډو عملیاتو کې کشف شوی دی. 

غوري وايي : ( په راخوشي شویو کسانو کې  د ملی اردو دوه سرتېري، یوپولیس او یو ملکي اختطاف شوی کس شامل دي چې په دغه زندان کې د وسله والو مخالفینو له خوا شکنجه کیدل.)

دا لومړی ځل دی چې په هرات ولایت کې د دولت ضد وسله والو یو محبس کشف کیږی

(چهارشنبه) ولسمشرکرزي د افغانستان د انتخاباتي کمیسون د غړي  مولوي مصطفی بارکزي استعفا ونه منله .نوموړي د انتخاباتي درغلیو په چارو کې د ده په وینا د دې کمیسون د بهرنیوغړیو د خپلسرو اقداماتوپه اعتراض کې استعفا کړې وه . 

د جمهوري ریاست له ماڼۍ څخه په یوې خبرپاڼې کې ویل شوي چې  دافغانستان د اسلامي جمهوریت جمهوررييس حامدکرزي د انتخاباتو د شکایتونو د څیړلو د کمیسیون دغړي مولوي مصطفی بارکزي استعفا ونه منله او له هغه څخه یې وغوښتل چې خپلې دندې ته دوام ورکړي.

په خبرپاڼه کې وړاندې ویل شوي چې  حامدکرزی د مولوي مصطفی بارکزي له صادقانه خدمتونو څخه د قدرونې په ترڅ کې د هغه داستعفا په پاڼه کې لیکلي چې: ((د تشویش اواندیښنې په درک اوستاسو نظرونوته په احترام سره ستاسو دهېوادپالو او صادقانه خدمتونو څخه د قدردانۍ په ترڅ کې، د استعفی په نسبت د انتخاباتو د شکایتونو د څیړلو په کمیسیون کې ستاسو د دندې دوام موجه ګڼم، هغه دافغانستان د ملت په خیر اوصلاح بولم او دانتخاباتو د شکایتونو د څیړلو له کمیسیون څخه هیله لرم چې ستاسو د اندیښنو د لرې کولو لپاره دې  په اقدام لاس پورې کړي.))

مولوي مصطفی بارکزي د روانې اوونۍ د دوشنبې په ورځ پرهغه څه نیوکه وکړه  چې ده د انتخاباتو د شکایتونو د څیړلو په کمیسیون کې د بهرنیانو لاسوهنه بللې وه ، او د اعتراض په دود یې له دې کمیسون څخه خپله استعفا دافغانستان ولسمشرته وړاندې کړه.

د ملګرو ترڅارنې لاندې د انتخاباتي شکایتونو کمیسون پنځه غړي لري چې درې یې بهرنیان او دوه افغانان دي او مشري یې هم د یوه برهني په غاړه ده .

(چهارشنبه) د افغانستان ولسي جرګې د دغه هيواد له امنيتي ارګانونو وغوښتل چې په دوو اونيو كې د امنيت د ښه كولو لپاره يوه ستراتيژيكه طرحه جوړه كړي.

 دغه وړانديز نن د ولسي جرګې په عمومي غونډه كې وشو.

 دې غونډې ته په روانه اونۍ كې د دويم ځل لپاره  د افغانستان د ملي دفاع، كورنيو چارو وزيران او د ملي امنيت عمومي رئيس راغوښتل شوي و.

 د ولسي جرګې غړيو له دوى څخه د افغانستان د امنيتي وضعيت د ښه كولو لپاره د  لا جدي اقداماتو غوښتنه وكړه.

 افغان چارواكي وايي، د دې نوې څانګې په پرانستلو سره د شمالي ولايتونو د پوليسو د روزنې د مركز ظرفيت لوړ شوی او په مياشت كې به څلور سوه پوليس روزي.

 دفاع او كورنيو چارو وزيرانو او د ملي امنيت ریيس د تيرې شنبې په ورځ هم د جرګې غړو ته د هېواد روان امنيتي وضيعت تشريح او د امنيتي تدابيرو په هكله يې معلومات وركړي وو.

خو د درې واړو ارګانونو مسوولين د چهارشنبى په ورځ له يولړ نورو پوښتنو سره هم مخ شول.

د ولسې جرګې رييس محمد يونس قانوني وويل، دې ته ضرورت دى، چې درې واړه ارګانونه په ګډه سره يوه امنيتي ستراتيژي ترتيب كړي.

((په لومړي سر کې زموږ د امنیتي ارګانونو تر منځ او بیا له بهرنیو ځواکونو سره د یوې هماهنګې طرحې جوړولو ته جدي ضرورت دی.

وړاندیز کوو، چې د درېواړو ارګانونو مسوولین په دوه اونیو کې یوه واحده طرحه ترتیب او د جرګې له غړو سره یې شریکه کړي، په دې صورت کې به موږ د یوې امنیتي طرحې خاوندان شو."

په غونډه كې دا هم وويل شول چې، په دې وروستيو كې ناامني د هېواد شمالي برخو ته هم غځيدلې او د دې ترڅنګ ويل كيږي، چې ځينې مشكوك خلك په هليكوپټرو كې شمال ته ليږدول كيږي، چې له امله يې په شمالي برخو خلك انديښمن شوي دي.

د دفاع وزير جنرال عبدالرحيم وردك وويل، ولسي جرګه بايد د امنيتي طرحې په جوړولو كي له دوى سره مرسته وكړي:

"موږ له محترمو وکیلانو څخه هیله کوو، چې د ولایتونو د امنیتي پلاونو په طرحه او ترتیب کې له موږ سره واوسي، ترڅو د هغوی د نظریاتو په پام کې نیولو سره ښه امنیتي پلان ولرو.)) 

په دې وروستيو كې د افغانستان په شمالي ولايتونو كې هم د ناامنيو د ډيريدو انديښنې راپورته شوي دي